而家正有消息話，27歲內地網紅「晚安安」在消失超過一年後，於10月12日晚突然發佈影片宣佈回歸。佢透露自己喺2025年6月意外從湖南長沙某小區35樓高處墮下，經歷14小時緊急手術、10多次大手術，以及50天ICU治療，最終右腿被迫截肢，但成功戰勝劇痛與精神創傷「重獲新生」。
據了解，意外發生喺2025年6月10日清晨5時左右。當時「晚安安」喺湖南長沙某小區不慎墮樓，隨即被送往中南大學湘雅三醫院搶救。參與救治嘅重症醫學科副主任級醫生邢偉表示，佢哋為咗搶救佢，曾經進行過持續14小時嘅手術，入院時佢處於昏迷狀態。經過50多天嘅治療，佢先至逐漸恢復意識並脫離呼吸機。
醫生表示，因為當時小區地面有密集綠化樹木，為佢嘅墮樓過程提供關鍵緩衝，成為創造生命奇蹟嘅重要因素之一。而「晚安安」喺影片中哽咽講述，佢喺ICU清醒後發現右腿已經被截肢，原以為已經「通關」，但轉出普通病房後才是真正嘅「地獄級復活賽」。
佢解釋，因為止痛藥同鎮靜劑減量，喺剛出ICU嘅48小時內，佢僅睡不足3小時，全身插滿管子，承受鑽心痛楚。甚至出現選擇性失憶同肌肉退化，曾無數次考慮放棄。不過佢強調，「我嘅命係醫生護士同所有愛我嘅人一齊從老天手裏搶回來嘅，講謝謝太輕，所以我決定好好活著。」
目前佢已能坐輪椅出行，未來亦計劃安裝義肢。其所属MCN機構「白晝互娛」證實佢已經準備復出。當日發佈嘅重生影片獲得逾20萬點讚，唔少網民留言鼓勵佢勇敢面對生活。
