而家（13日）港鐵觀塘綫藍田站路軌旁發生火警，觀塘站至調景嶺站列車服務暫時停擺，藍田站亦需關閉。根據網上相片所見，站內不斷作出廣播及告示，指「由於發生嚴重事故，本站將會關閉，乘客必須立即離開」。多名打工仔指收工準備搭港鐵回家時突然聽到站內廣播，只能立即離開。有乘客準備由油塘站乘搭港鐵，得悉藍田站發生火警後，無奈決定「棄鐵」，從油塘慢慢徒步到觀塘，其間見到整條鯉魚門道及觀塘道被迫得水洩不通，有網民留言「放工時間玩呢啲？！」、「未試過咁多人一齊由油塘行翻去觀塘」、「踏上這無盡旅途」。
有市民指因觀塘站至調景嶺站列車服務中斷，不少人改搭巴士回將軍澳或油塘，令觀塘道多個巴士站擠滿人潮，竟有打工仔為趕回家，在巴士中門逼上車，網民指「我知大家都想快啲返屋企，但係咪真係有需要喺中門逼上車？地鐵一壞，啲壓力全畀觀塘道及巴士，大家將心比己下」。
