而家內地爆出一宗極具爭議嘅「釣魚執法」舉報事件。有長期喺廣東佛山某私家醫院求診嘅病人，主動向藥房職員送贈一罐價值1.9元人民幣（約2.2港元）嘅健力寶汽水，事後竟然向有關部門舉報該職員「違規收禮」。
據佛山12345市民服務熱線工單顯示，被舉報人為該醫院藥房梁姓工作人員。佛山市禪城區卫生健康局10月13日證實事件，但強調醫院無權強制退還物品，已對涉事職員作出嚴厲批評。
當局調查發現，舉報人係該醫院長期病人。事發時，梁姓職員並未主動索要物品，認為病人送贈汽水屬表達謝意，因「盛情難卻」而收下。醫院表示會加強員工廉潔培訓，持續監督醫德醫風。
事件曝光後，網民嘅反應兩極。大部分都唔客氣咁批評，指兩塊錢嘅問題要花好多時間處理，認為如此會破壞醫患信任。有少數人則無奈表示，雖然患者動機唔純，但醫護人員日後最好唔該接觸任何禮物，以免惹麻煩。
資料顯示，「12345」市民服務熱線係用嚟接收市民對政府工作、公共服務、社會管理等範疇嘅意見，包括投訴、舉報同建議。
