年輕人儲錢一向困難，但有志者事竟成。有15歲少年喺社交平台Threads發文，分享自己喺天水圍區快餐店兼職年半，成功儲到一萬港元，並附上銀行戶口結餘截圖證明。帖文三小時就吸引逾萬個贊，至今已突破50萬瀏覽，樓主自己都驚訝「諗唔到會咁多人睇」。
有網民諷刺指，15歲少年儲到一萬，如有另一半就「會清零」，更有則表示會變負資產。不過亦有搞笑建議：「建議樓主搵90歲+男朋友，好快就會多幾個零」。樓主幽默回應：「放心，我有信心我嘅樣唔會有人鍾意」。
其中一位網民上載戶口結餘達港元26,065.90，並說明係「返咗半年（利申淨係洗過1,700元俾請屋企人食飯同買銀包俾媽咪）其他全部儲住冇用過」，直接與樓主比較，掀起良性儲錢挑戰。
有過來人留言提醒樓主「財不可露眼」，勸他唔好咁易信人，唔好畀班美容檔呃左去。樓主亦透露，兼職收入有1/4至一半用作定期存款，並計劃用作DSE考試同日本遊學開支，其孝順行為獲網民稱讚。
延伸閱讀：有24歲女子因返六休一儲蓄24萬，一秒被呃清光，絕望發文：「感嘆自己嘅愚蠢」。
