而家正於TVB翡翠台播映《逐玉》，逢星期一至五晚10時開始，由內地當紅男神張凌赫同人氣小花田曦薇主演。劇集早前內地開播已掀熱潮，口碑同熱度力壓同期作品。張凌赫飾演氣質清冷嘅落難侯爺「謝征」，與田曦薇嘅「樊長玉」譜寫動人虐戀，佢哋嘅化學反應成爲話題。
28歲嘅張凌赫以理工科背景聞名，非科班出身嘅佢自細夢想做科學家。佢喺2016年江蘇高考中取得總分480分，理科成績高達378分，當中數學182分（滿分200分），物理同化學均獲雙A+。佢其後考入南京師範大學電氣與自動化工程學院，若當初冇入娛樂圈，現時或者正從事電機工程師工作。
張凌赫學生時期曾重達220磅，同現時嘅俊美外型形成強烈對比。佢曾表示擔心身高190cm會影響女拍檔，甚至將官方資料中身高寫成188cm。早前曝光嘅學長照片顯示，佢透過每日跑五公里同嚴格飲食控制，成功減重50磅，化身校草。
資深粉絲都話張凌赫好似「女神收割機」，曾同虞書欣、白鹿、趙今麥、田曦薇等頂流女演員合作，每次出場都會吸引大批關注。而《逐玉》爆紅後，佢所到之處都人滿為患，今年5月喺南寧出席活動時，千名粉絲衝破商場玻璃門見偶像，導致場面混亂，事件喺網上引起熱議。
