都市人生活繁忙，好多人都會選購連鎖快餐解決三餐，但對快餐店嘅服務，一般食客都唔太有期望。而家，將軍澳中心大快活分店嘅服務卻有驚喜，有食客在網上分享，自己外帶落去嘅途中，突然接到店員電話，告知漏咗醬汁並主動提出補送。呢個出乎意料嘅關心，令佢覺得「有愛」，甚至話自己獲得「米芝蓮級數」嘅服務。
事主於將軍澳中心大快活分店買咗一份價值50元嘅雞胸雜扒飯外帶，結果發現漏咗黑椒汁。當佢返到屋企途中，突然接到一通陌生電話，以為係推銷電話，冇料到係快餐店職員特意致電，為漏汁一事道歉。
職員見事主唔接，就主動提出「冇汁好難送飯㗎喎，你去到邊啊我拎俾你啦」，雖然事主當下都唔想補送，但對方仍然唔放心，連環追問：「真係唔使汁？會唔會好難送飯？會唔會冇咁好味呀？你確定真係唔需要？」
事件曝光後，網上出現大量正面評論，有網民驚嘆員工發現遺漏物會主動致電已是「難得X100」，更主動提出派人送回醬汁則係「難得X10000」。甚至有留言開玩笑話，致電嘅員工係唔係大快活著名服務教練「曹美女」。
事後，大快活官方社交平台嘅小編親自留言回應，話「Sorry 漏咗個汁！但睇完你嘅feedback覺得好有愛」，唔僅大方承認員工工作上嘅小失誤，更加多謝食客嘅包容同正面反饋。
