「家用應該畀幾多？」經常成為網民之間話題，尤其初入職場嘅年輕打工仔，對每月應繳數字一片迷茫。近日有港人於社交平台發文，講述每逢到出糧日回家，甫入屋即被家人問「撳咗錢未」，對被視為提款機嘅感受感到「唔好受」。

帖文引發唔少網民同感，有打工仔慨嘆家人似係情緒勒索，自己似係被當作提款機一樣。有回應指：「明明細個算錫我，大個越嚟越煩，成日到出糧嗰期就係咁問問問」「出糧未、提款未，一入屋連休息都未開始就要答，聽落真係好心酸」「講到欠咗佢咁，唔比就唔好喺度住，遲咗幾日就發晒脾氣，點解喺出面捱餐死返到屋企仲要被人搶錢」。

有網民分析指「家用」問題多發生喺華人社會，特別係「養兒防老」觀念影響深遠：「你呢啲情況都唔少，畢竟華人家庭唔講愛，好多時只係養兒防老，或者係朋輩之間競爭嘅工具」。同時有建議指對父母唔需要過於誠實，「唔好好似食誠實豆沙包咁，扮窮扮低人工」，認為只會不斷被榨乾。

不過有網民指出，雖然有家長「看重」家用，但有唔少人嘅父母反而「佛系」對待。例如有回應提到：「我媽好佛系，不過我一向自動波上繳中央」「老母追數咁催又嫌少，反而老豆仲會擔心我冇錢洗嗌我留起，真係一個天一個地，睇到邊個先係最關心自己」。

文:R 資料及圖片來源:Threads