新皇崗口岸今早6時半正式落成啟用，提供24小時通關服務。內地《羊城晚報》今日訪問首個由深圳出境返港嘅車主「麥女士」，原來係香港知名堪輿學家麥玲玲。佢表示今日要由深圳返港工作，為咗嘗鮮便提早5時半出發，結果意外成為首位過關車主。

麥玲玲指，因工作關係經常周末往返深圳，以往都會用舊皇崗口岸。得知新口岸今日對公眾開放，便決定親身體驗。佢笑言為免排隊，天未光即時出發，結果5時50分抵達口岸時，發現無車龍，驚訝自己竟然成為首個體驗新設施嘅車主。

佢讚新口岸過關流程更簡單，以往需分別通過內地同香港關卡，並出示回鄉證同身份證，而新口岸採用合作檢查模式，只需用一次回鄉證同打指模便完成海關檢查，最快可於一分鐘內完成。麥玲玲又指新口岸建築宏大，有助聚集人流，但部分樓層唔係露天設計，要依賴抽風系統，擔心人流車流多時可能過熱。