案件續審第14日，在法庭對質時，蔡母張燕花指鄺港智「開頭唔同意（賣樓）」，而辯方則質疑指2022年10月底鄺港智曾帶鄺球到律師樓打算簽署授權書，證明佢願意賣樓。張燕花今應「我鬧佢佢先肯嘛」，曾聲稱「你要有誠意，你帶你老豆去旺角做個委托書好容易咋嘛」，並補充「講真，如果佢真係咁有誠意咁我哋今日就唔使喺呢個法庭見喇」。
辯方引述張燕花與蔡天鳳2022年10月至翌年1月的微信對話，指其中提及「畀10萬阿駿」，張燕花解釋該筆資金由譚方駿提供，作抵消用途。另外，張燕花承認七人車以30多萬售出，海南物業以300多萬售出，全部款項落咗鄺球戶口，而兌換店會將現金交俾蔡天鳳。賣車所得37萬經鄺港智廣州友人匯款來港。
辯方指出鄺港智曾建議蔡天鳳搬去屯門黃金海岸及掃管笏滿名山，張燕花反駁指「鄺港智係冇可能同細路仔住喺哈羅嗰度⋯⋯喺邊度都唔輪到佢話事」，同時又罵道「佢老豆係廢㗎，冇權話事你知唔知」。而她又補充「幾百萬你都唔肯攞返來，嗰啲幾千萬點算呀？」以強調鄺港智態度問題。
張燕花當庭反駁辯方指佢剪裁證供迎合控方，聲稱「你千祈唔好冤枉我，我配合警方來調查，咩叫剪裁呀？幾百萬、三十幾萬都唔肯，你重未睇得清楚」。辯方質疑她不曉得鄺港智與蔡天鳳之間所有溝通，張燕花則指「佢溝通我唔知，但我睇到，從一架車海南層樓，幾百萬佢都唔肯，我知道唔肯」。
三人被控1項謀殺罪及1項阻礙合法埋葬屍體罪，其中鄺港傑及鄺港智承認後者，但否認謀殺罪。控方由外聘資深大律師郭莎樂、高級助理刑事檢控專員梁育珩等人代表，本案以英語進行，由暫委法官祁彥輝審理。案件編號：HCCC198/2025，法庭記者：陳子豪 黃巧兒。
