湖北黃石市政府今日宣布，該市跨長江的黃石長江公路大橋因嚴重結構問題存在安全風險，已唔符合安全通行標準，將於15日凌晨零時起全橋封閉，車輛同行人一概唔得通行。

經專家研究同多部門聯合評估，當局最終決定採用改擴建方法消風險。將拆卸現有橋墩，喺原址重建一座主橋750米跨距嘅組合梁斜拉橋。

新橋按雙向六車道一級公路標準建設，設計時速80公里，橋塔高達212米，預計總投資38.284億元人民幣，建設期約5年。

封橋後，原來經該橋過江嘅車輛可選擇鄂東長江大橋、鄂黃長江大橋、即將通車嘅燕磯長江大橋同下游棋盤洲長江大橋分流。

而家被封閉嘅黃石長江公路大橋係1995年落成，長期車流量同載重都遠超設計標準，再加橋墩曾被船隻撞擊過20多次，導致結構損傷持續積累。