嘉頓（Garden）今日（11日）喺灣仔聖公會鄧肇堅中學辦活動，想挑戰最多人同時製作三文治嘅世界紀錄。話說活動當日有逾700名小學生參與，不過有家長喺社交平台爆料，指活動超時一小時，而且大會完全冇交代接回子女嘅安排，令現場出現混亂情況。

有家長親身經歷表示，活動時現場人多到已經水洩不通，而且工作人員人數唔足，導致家長要自行衝入禮堂尋找仔女。有家長更聲稱，當時成班家長塞住HALL門口，甚至有個別家長因為心急而破壞門柄，一度險些造成人踩人事件。

雖然有家長指事件係因為個別家長特別心急，突然衝入禮堂所致，不過嘉頓回覆《星島》查詢，證實活動結束時因現場人數眾多，家長希望即時會合，導致出現推撞行為，門柄因而脫落。嘉頓強調無打架及傷亡，並會全面檢討大型活動嘅入場及人流管制安排。