吳小姐自稱係「貓行為訓練師」，Instagram專頁「pika.pikachu.0522」有約3萬名追蹤者。佢表示8月3日晚上9點，自己照常帶愛貓去公園散步，當時貓隻已配戴牽繩並受妥善管理，無騷擾他人或破壞環境，惟因保安指公園唔許任何寵物入內而遭驅趕。佢多次現場說明現行法例唔禁止貓隻入內，但保安拒絕聽取合理解釋。
吳小姐稱2021至2023年間亦曾有4次類似情況，但以往經1823投訴後情況依然無改善。因此佢喺8月中直接去信特首辦，指控康文署「集體執法失當、長期誤解法例，部門監督嚴重失責」。至8月底，康文署人員電聯吳小姐，承認有改善空間，並安排9月24日由場地主管親自當面道歉。
當日場地主管喺經理陪同下向吳小姐鞠躬致歉，指「因為我唔係咁熟悉條例，真係唔好意思，我應承過同你道歉，我而家鄭重同你講對唔住」。吳小姐之後自行製作橫幅展示《遊樂場地規例》條文，於放貓時懸掛背囊，向市民說明公園放貓係符合法例。佢慨嘆話：「寵物友善並非口頭上嘅形式主義，一邊進步一邊後退，希望唔同人理解呢個法例。」
