為響應全民愛牙日，衞生署今日（11日）喺鑽石山荷里活廣場舉辦「齒生伴你」嘉年華，設有多個牙齒健康攤位遊戲、資訊站及展覽，吸引唔少市民參與。衞生署署長林文健致辭時指出，保護牙齒唔係一時三刻嘅事，而係一輩子嘅責任，提醒市民要從小建立良好護牙習慣，長大先有健康牙齒基礎。佢強調若想「牙齒當金使」，就需要每日早晚刷牙，定期接受口腔檢查等基本護理。
林文健提到，政府牙科服務圍繞市民全生命週期，包括在母嬰健康院為0至3歲幼兒提供牙齒檢查及護理服務。現時3至6歲學童已推行學前口腔外展計劃，全港7成幼稚園登記參與，接受外展服務同簡單牙科護理。小學階段會處理蛀牙問題，青少年至18歲則有「青少年護齒共同治理先導計劃」，由政府資助每個人每年接受一次家庭牙醫服務。
針對成人，基層醫療署由2027年起會於每區設置地區康健中心，為高風險市民以網絡配對區內牙醫提供檢查護理服務。長者方面，衞生署會同不同機構，為殘疾人士同長者院舍提供外展服務，並預計明年擴展至殘疾院舍。
衞生署牙科服務主任顧問醫生許美賢解釋，本港口腔健康策略係「做寬做淺，做窄做深」，為市民提供基礎預防服務，同時為弱勢社群如無家者提供深入照顧。現時已有30多間非政府機構參與幼稚園外展牙科服務，社區牙科支援計劃更吸引32間機構加入，至今已服務數萬人。
