而家好高興參加由香港旅遊發展局舉辦嘅2026新鴻基地產香港單車節頒獎典禮，首先我要恭喜所有得獎車手，你們用汗水、速度同毅力取得佳績，亦為香港帶來充滿動感嘅早晨。

呢次活動唔單止係比賽，更係全城共享嘅體育盛事。無論係職業單車選手，或者參與嘉年華嘅市民同旅客，都全情投入。賽線沿途響起打氣聲同歡笑聲，全城熱絡非凡。

今年活動有好多新亮點，當中國際單車聯盟1.1級公路賽線串連昂船洲大橋、啟德體育園、香港故宮文化博物館等著名地標。十七支世界頂尖車隊同近一百名精英車手，在香港多個標誌性橋樑同景點間激烈競爭，展現香港獨特城市風貌。

56公里項目首次推出「五隧三橋」新路線，完美融合香港多個地標同城市天際線。相信所有選手、市民同旅客都感受到呢種獨特魅力。另外，旅遊發展局今年再度喺西九文化區舉辦單車嘉年華，將音樂同運動元素結合，提供多元化嘅體育體驗。

我哋期望市民同旅客唔單止睇比賽，更可以親身參與。透過豐富互動活動，一齊投入感受香港單車節嘅熱鬧氣氛。今日活動充分體現體育可以帶動旅遊，盛事有助凝聚民心。

行政長官上月公布嘅《香港第一個五年規劃》同2026年《施政報告》都前瞻性勾劃未來五年人旅遊發展方向，並提出深化文化、體育同旅遊協同發展嘅具體舉措。香港單車節正係一個「體育+盛事」嘅好例子。

未來會繼續將各類活動同旅遊結合，提升對海內外旅客嘅吸引力，推動「盛事+旅遊」模式。睇緊今年一系列新元素、新體驗順利舉行，實係多虧主辦機構旅遊發展局全體同事嘅努力，感謝佢哋以國際級規模展現香港活力。

當然我亦要感謝冠名贊助新鴻基地產、各贊助商同支持機構全程投入，令活動有聲有色。最後再次祝賀所有得獎選手，祝願參與嘉年華嘅朋友玩得盡興，繼續支持香港單車節及其他盛事，一齊展現香港嘅活力同精彩。多謝大家。