旅發局主辦嘅「2026新鴻基地產香港單車節」而家（11日）舉行，非競賽單車組約6點40分完賽。新鴻基執行董事郭基煇表示，今年有過4000人參與56公里賽事，形容氣氛十分好。佢指今屆路線首次經過中九龍繞道，因增加上落斜路段，賽道具挑戰性，最終靠團隊支持，約1.5小時完成。郭基煇讚揚路線新加入中九龍繞道同「五隧三橋」元素，佢又指終點移師西九文化區，充分展現香港「體育+旅遊」獨特魅力。
郭基煇喺分享沿途感受時表示，雖然係第八年參賽，但過程依然難忘。佢提到大約6點時段喺昂船洲大橋看到日出，形容景色十分難得同漂亮。佢指今年賽道因加入中九龍繞道，出現唔少「落斜又上斜」路段，加上「五隧三橋」設計，對車手係全新嘅挑戰，體力消耗較大。不過佢表示，靠團隊同年輕隊友互相破風支援，最終順利完賽，指「大家互相禮讓，過程辛苦但有成就感」。
另外，郭基煇又提及項目起點同終點改喺西九文化區，係因該區屬結合藝術文化、商業同體育嘅新地標，期望為旅客帶來新體驗。活動吸引近1000名外地遊客參與，包括16隊海外大學生車隊，佢認為舉辦大中小型體育賽事，對推動本地旅遊業有幫助。
