而家又驚傳「人造假榴槤」離譜騙案，浙江一名女子於10月8日下班時，在路邊流動水果攤買到一個「假榴槤」。佢見到標價9.9蚊一斤嘅榴槤外殼金黃帶刺，聞起香氣濃郁，於是選購一個約數斤重、售價38蚊嘅榴槤。
攤主當場保證「包熟包甜」，但當事主提出想現場開殼睇貨時，對方卻以「冇塑膠盒裝」為由拒絕，再三勸她「帶回家放放先開」。結果事主返家切開後，發現殼係真嘅，但果肉係一團帶彈性嘅黃色膠狀物，中間更塞住一塊熟薯仔扮果核。
業內人士指騙徒用真榴槤殼掩蓋，內裡填充仿真實膠，並以薯仔增加重量。事主後續表示只係分享遇騙經歷，未有編造或誇大，並唔想引起網暴。目前市场監管部門已接獲投訴並跟進調查。
網民留言指事件荒謬，有指「一個榴槤唔係好貴啫」、「係咪人工榴槤？好似捏捏樂嘅」，亦有質疑「大車榴槤皮唔讓帶走，原來係咁嘅情況」。當局建議市民買高價水果時務必當面開殼驗貨，勿輕信無牌攤販嘅低價噱頭，並保留支付紀錄作為憑證。
