西貢清水灣懷疑有跑車同私家車深夜飆車。東九龍總區交通部執行及管制組早前接獲消息，指有司機相約前往清水灣道一帶飆車，警員於是喺昨日下午3時許到場部署，並出動無人機同雷射槍監察。

至昨晚10時左右，警方喺清水灣大坳門路同清水灣道附近發現涉事車輛，並喺近孟公屋將3輛車截停。當中一輛保時捷懷疑以時速約100公里來回行駛，另外兩輛白色寶馬私家車亦涉嫌超速，並未有保持安全車距。警員於是將3車截停調查，並以涉嫌「危險駕駛」等罪名將3名男司機拘捕，現正被扣留調查。

有傳其中一名寶馬司機曾喺社交平台上載疑似危險駕駛片段，片中車速據稱超過每小時140公里，並曾同其他車友合照。兩名寶馬司機據稱均為非華裔人士，而保時捷司機為本地人，當時獨自駕車到場。