香港上半年實質GDP錄得5.1%增長，創下近五年最強勁嘅半年度表現。香港總商會主席金澤培今日（10日）喺電視節目表示，雖然各界對增長感受唔一樣，但整體消費信心已改善，佢相信「北部都會區」長遠容納250萬人口，將為零售、餐飲等行業帶來龐大商機。
金澤培澄清政府推出嘅「五年規劃」唔係走向「計劃經濟」，而是提供中長期發展方向，實際投資同產業發展仍然由市場決定。佢指香港一直係政府引導方向並提供基建配套，例如交通、供水、供電、土地同房屋等，而市場則根據需求進行投資建設。
社會上有聲音指香港現時係「K型經濟」，市面或實體零售未能感受經濟增長。金澤培重申推動「盛事經濟」同「節日經濟」係正確方向，佢以「十一黃金周」消費即時改善為例，表明北都將提供長遠增長機遇。當前預計北都將容納250萬人口，等於現時香港三分之一市場規模。
面對人工智能（AI）浪潮，金澤培表示總商會支持施政報告提出嘅3萬個青年職位同實習計劃，並設有不同方案協助青年入職。佢相信AI出現會衍生新工作，目前重點係做好青年培訓。佢以電腦同互聯網出現時為例，說明技術改變唔會完全取代現有工作，反而會產生新需求。
就北都首個片區洪水橋發展，財團目前僅發展三幅產業地當中一幅，餘下兩幅平整後交回政府。有意見關注發展信心，但金澤培認為產業規模會根據市場需求逐步擴張，同以往單純批地起樓嘅模式唔一樣，而係將土地開發同產業管理結合，屬新嘗試。
總商會原定去年率團訪美，但因中美關係影響而延期。近日國家主席習近平訪美後，被問及總商會短期內會唔會重啟訪美行程，金澤培未有直接回應，僅形容現時係「戰略穩定窗口期」，係內地企業走出去同外資引入來嘅黃金機會。總商會已先後出訪中東、中亞同东南亚多個潛在市場，未來會繼續協助會員把握商機。
