Gen Y（Y世代）指1981年至1996年出世嘅一代，而家30至45歲，正處成家立室同職場拼搏階段。不過最新調查發現，唔少Y世代對人生方向感迷失，幸福感低。有網民喺Threads留言，指自己一直認為Y世代職場順風順水，質疑「Gen Y明明咁多順風位，點解成個最唔開心嘅一代」，話題立刻喺網上熱議。
調查顯示香港人幸福感呈U型曲線，年輕同長者較開心，中年最唔開心。當中未婚Y世代開心指數及滿意度分別只得5.18分同5.13分，低過已婚家長群組（6.01分及5.94分）。研究認為佢哋對經濟同社會前景有焦虑，而人生方向亦感迷茫。
有網民指Y世代畢業時正處沙士、金融海嘯同疫情，實係處於風暴中心。比如有留言講：「好多人畢業撞正2000年股災、2008年股災，全球個市都跌過半，頭10年完美撞正去兩個全球股災」。佢哋更指自仔仔時就面對97金融風暴，屋企資產流失，中學畢業遇雷曼事件，大學畢業撞正金融風暴，時至而家又遇上疫情，人生一路都係Crisis，唔係真係有咁易。
網民直言即管部分Y世代現時職位唔俗，但要追上落後差距極困難。有留言提到：「畢業第一份工都係得8K，每月還學貸，啲人成日話食正時代紅利，我都唔知有咩紅利」。另外有留言表示：「沙士、金融海嘯、雷曼、疫情樣樣齊，第一份連勤工都只得$3600，唔做大把人爭，當年係冇最低工資」。
