48歲電工學徒去年6月飲酒至凌晨後到旺角一間冰室食早餐，突然出襲擊冰室內一名14歲內地少年，扼頸將其按在卡座，更用「留座」金屬牌擊打少年頭部。同座位嘅23歲女食客亦遭襲擊，頭部流血。被告今日（16日）喺區域法院承認3項有意圖而傷人罪，暫委法官潘志明直斥被告「絕對係好野蠻嘅行為」，強調一個無辜食客都唔放過，不過幸無造成永久傷殘。
被告陳鷹揚承認2項有意圖而傷人罪，以及1項企圖傷人罪；原控1項襲擊執勤警察罪已獲法庭存檔。法官接納被告受酒精影響，短時間內隨手拿起金屬牌行兇，並非預謀犯罪，但關注閉路電視片段中被告情緒激動，連續襲擊無辜市民，造成受害人痛苦及驚恐，最終因被告適時認罪顯示悔意而判囚26個月。
案發當日，14歲邹姓少年同母親及友人喺旺角砵蘭街「貳號冰室」食早餐，被告同女友人之後亦到該冰室用膳。被告喺約9時半離開座位，在6號枱邊游蕩。當邹姓少年跟住母親及友人準備離開時，喺6號枱邊遇見被告，被告質問「你玩完未呀？」，少年不斷道歉。被告其後搶走少年手上嘅水樽，再扼其頸部按至卡座，少年起身嘅時候更被被告扯住背囊阻撓，最終被告用金屬牌擊打少年頭部兩下。
23歲范姓女食客目擊事發過程，當她舉起左手防禦時，被告用金屬牌擊打她頭部一度流血。冰室主任何姓亦上前阻止，左額亦遭襲擊。被告最終被其他人制服，情緒激動不斷掙扎大叫。三人當日均有傷勢，但均無永久性損傷。被告喺警誡期間表示當日係醉酒狀態，對事件感到抱歉，願意承擔醫療費用。
辯方求情指被告成長於單親家庭，因酒精影響誤會受挑釁而行兇，並強調被告已深感悔意，願意道歉及賠償。被告母親有精神病需住治療中心，但仍每日探望被告。法官怒斥「你媽媽咁大年紀，山長水遠去探你，你好唔好意思呀？」。辯方亦獲企業求情，指被告有責任心、待人有禮，保證會僱用獲釋後嘅被告，協助佢重新做人。
