觀塘翠屏（北）邨及沙田博康邨合共48部升降機，施工存在嚴重缺失，無安裝耐火門門框組件。《星島》記者16日早到博康邨現場查看，發現邨內冇見圍封或進行安裝工程，亦冇張貼相關告示。多名居民受訪時表示，對物業管理及業主立案法團未有主動通知感到不安，憂慮日常出入安全，促請政府及早介入並跟進維修。
博康邨現場未見圍封或告示，住喺博達樓嘅吳先生話，自己係睇新聞先知悉升降機出現安全問題，之前完全無收到物管或業主立案法團嘅通知。佢坦言覺得不安，同埋直接指出事件令佢對邨內其他維修工程失去信心，希望政府盡快安排維修同埋切實跟進。
住喺博安樓嘅Anna婆婆同樣指物管同業主立案法團均未有主動告知事件。佢提到雖然近年升降機損壞次數減少，但仍時有發生，而過往維修工人嘅工作表現唔佳，惟未發現有違規情況。佢話對業主立案法團「不抱期望」，只希望政府可以盡快跟進。
居民陳婆婆指出，若非政府進行突擊檢查，作為普通居民根本無可能發現問題。佢話之前有公告聲稱已完成維修，而維修後升降機運作無異樣。至於預計每部升降機門框加裝工桯可於1至2日完成，佢認為過程迅速，唔會影響日常生活。
居民張先生表示對升降機出事唔感意外。佢透露早前升降機按鈕出現問題，已為居民帶來不便，反映維修事宜根本未考慮居民意見。佢希望政府積極跟進，以保障居民出入安全。
