而家正讀小五嘅尉蕎喺北角循道學校就讀，身兼香港體育舞蹈代表隊拉丁舞隊員。要應付呈分試同高強度訓練，佢以鐵人時間表安排作息，早上六點五十起床出學，放學後半小時完成功課，下午四點半至五點溫習，五點至六點練舞。之後睇書、食飯同親子時間，八點準時就寢；周末則集中舞蹈室訓練。臨近考試會靈活調節時間，確保學業唔落後。
尉蕎由幼稚園開始學拉丁舞，初時單純因見朋友學咗覺得有趣而報名。當時由於唔識舞步同唔諗得導師指令，一個月先可以完成一套動作。但與同伴共舞嘅樂趣，成為佢堅持嘅動力。近年佢屢獲國際賽佳績，包括去年「DSA亞洲青少年錦標賽—香港2024（測試賽）」8歲組拉丁舞五項亞軍，以及「2024英國黑池舞蹈節國際標準舞公開賽（深圳站）」8歲以下雙人拉丁舞冠軍。
媽媽為尉蕎設下明確底線：「跳舞跳得好嘅同時，一定要讀好書。」若成績退步，就要減少練舞時間。雖然唔常同家人傾訴壓力，但房內嘅毛公仔小熊維尼成咗佢嘅安全感來源。媽媽亦會親自下廚，煮炒飯同雞翼為女兒打氣。
上月賽事中，尉蕎因現場手續多而熱身時間不足，影響前半場發揮。導師直言佢動作延展度不足同節拍唔準。不過佢冇氣餒，中場休息時細心觀察對手，腦內重溫舞步，最終後半場反彈。此後佢打算重拾鋼琴，強化節奏感。亦有向姐姐同英文老師請教，提升英語會話能力以應付未來國際賽事。
北角循道學校校長鄭家明表示欣慰，讚賞尉蕎嘅自律同堅毅。校方一直鼓勵學生多元發展，除學業支援外，亦透過「師生午膳蜜蜜傾」同「北循夢廣場」等活動，讓同學分享壓力，老師成為追夢伙伴，同時讓學生嘅才華有更多曝光機會。
