而家（14日）有網民喺Threads平台爆出親身經歷，指自己同丈夫交往4年後新婚不夠1年，原本覺得與男家關係唔錯，因婚前婆婆曾承諾「如果我老公做錯咩事，佢哋一家人都會企喺我嗰邊，話佢哋一家人都好錫我，當正我係女」。

然而兩個星期前，佢發現丈夫早在兩年前便開始「出去玩（邪骨）」。得知老公背叛後，婆婆不但唔責怪兒子，反而反問：「你做咩咁蠢睇佢手機？」令事主傷心不已，表示：「我覺得好傷心，唔只係我老公做呢啲嘢，仲要係佢屋企人其實一直都冇當我係自己人。」

佢進一步解釋，自己平日對夫家極好，每逢節日同父親節母親節都會同佢哋慶祝及買禮物，但最終換來絕情反應。佢現時已經日日同丈夫談離婚，但對方拒絕離婚，糾纏幾個鐘頭令佢疲於奔命。

網民對事件極大共鳴，留言區怒斥婆婆護短行為「好噁心」。有留言指：「做得人阿媽就要厚面皮，仆心仆命為自己仔女，有啲咩係做唔出？」「奶奶點會唔幫自己個親生仔。」更有評論諷刺：「你99（意指婆婆）講得啱，你真係蠢，居然信99會企你嗰邊。親生仔就係親生仔，你幾時見過要新抱唔要仔？」

理性網民分析婆婆冷靜反應可能有隱情，指「可能你奶奶同你老公咁多年，都係咁過嚟」，並提醒事主要問自己過唔過到自己。有過來人則痛心分享自個經歷，強調「不要信男家所有人講嘅話」，指婆婆曾假意照顧自己，但生仔後卻拒絕協助照顧，令佢逐漸懷疑這一家人。

部分網民勸喻事主「止蝕」離婚，直言出軌只有零次與無數次：「早走早著，有第一次絕對有下次，喺我身邊見到嘅無一個會真心回頭，全部得個講字。身邊見過一個忍到最後，隻佬係玩到喺大陸多咗頭家仲生埋仔。」