政府計劃透過附屬法例規範持牌私營醫療機構收費透明度，要求私家醫院於病人入院前提供「指明治療及程序」費用預算表。立法會衞生事務委員會將於下周五討論相關措施嘅落實安排。實政圓桌召集人田北辰就文件內容發表意見，表示支持但強調需加入「院方親口解釋及雙方簽名作實」程序。

田北辰指出，單憑費用預算表格唔夠，為免日後出現爭議，建議政府規定院方代表需向病人逐項解釋預算內容，解釋後由雙方簽名確認。佢表示：「如果冇呢個程序，事後病人一句『冇睇清楚』，就會變成『口同鼻拗』，非常麻煩。」佢又促請政府交代有無配套程序安排，並表示實政圓桌會繼續追問。

針對文件中以「超支20%」作為醫院需書面解釋嘅門檻，田北辰認為過於硬性，唔符合比例原則。佢建議按服務費用總額實施梯級調整：10萬以下超支20%需解釋，10萬至20萬超支15%需解釋，逾20萬超支10%即須交代。另建議容許私院先提交未經審核數據，待完成審核後即時更新，以減輕人手壓力。