Tesla而家喺周三晚舉行直播，隆重介紹新一代Roadster跑車，並展示車輛飛離坡道、空中翻轉落地等震撼動畫。行政總裁馬斯克親臨現場，佢喺展示完後高呼：「成功咗。會飛嘅汽車係真實存在。」消息曝光後，特斯拉美股夜盤即時彈升逾2%，SpaceX亦升約1.5%。
直播中見Roadster沿巨型彎曲坡道向上行駛，車身突然上下倒轉，隨後仿佛離地飛行併完成翻轉動作再穩穩落地。車尾裝有疑似推進器，協助完成飛行過程。馬斯克過去曾提出，未來會為Roadster加裝SpaceX提供嘅冷氣體推進器套件，令車輛擁有真正飛行能力。
馬斯克宣布新一代Roadster將於2028年開始生產，但現時首批客戶需先支付5,000美元訂金，之後10日內再付款4.5萬美元，總共5萬美元。雖然已開放預訂，但車價仍未公開。值得留意係，客戶自預訂至今已等咗近9年，原來第二代Roadster係喺2017年11月Tesla Semi貨車發布時首度亮相。
2017年首代Roadster已經展示過相關技術，當時宣佈車款由靜止加速至時速60英里僅需1.9秒，最高時速突破250英里，續航里程逾600英里，並配備200千瓦時電池組。當時Tesla同樣接受客戶預付5萬美元訂金預訂，更高階版更需預付25萬美元。不過因等候時間過長，馬斯克曾喺業績電話會議上向長期訂金持有人道歉，解釋公司優先發展機械人及自動駕駛技術。
佢當時形容Roadster係「糖霜上嘅櫻桃」，強調雖然仍處於研發階段，但需排後於對世界有更大影響嘅項目。而首代Roadster其實於2008年在加州推出，採用蓮花Elise車身，以電動系統取代汽油引擎，並喺2012年停產。而家呢部新版Roadster預計會有更大突破，馬斯克又喺X平台為活動造勢，聲稱將成「史上最精彩產品展示」之一，並預告「全世界都會睇」。
