張致恒（Steven）相繼遭債主揭發電費逾9千蚊，個別收費期更達數萬元。當日喺《東周網》直播中，佢自曝欠債約100萬，蔡卓妍（阿Sa）亦係債主之一。阿Sa日前喺活動上怒斥：「總之人哋冇欠你（張致恒），真係火都嚟呀！」

有傳媒接獲一段錄音，指張致恒約2015至2016年已購入儲蓄基金，預計50歲可取回300萬。佢喺錄音中強調：「唔係保險係基金，因為約六、七年我買咗基金，嗰時供斷咗，一直由佢自己『滾』存落去，而家過嚟要簽返啲嘢，50歲先有錢攞。」

張致恒表示為兒子未雨綢繆買基金：「諗住有啲咩留返俾個仔，佢個總價值去到50歲應該有300萬……最慘而家攞唔到咁解。」由於佢今年42歲，還有8年便達半百，被質疑唔申請綜援係因有基金可支應。

張致恒日前喺網上頻道《鼎豐盛》解釋電費累計問題：「當呢一期未交完，又叠住下一期時候，就變越滾越大。」佢指出七仙羽曾在電費逾期時幫忙繳清逾萬費用，強調當日係因住屋電費問題，才需七仙羽出手協助。

七仙羽接受訪問時承認曾幫張致恒繳付層樓電費、屋租及藥房費用，表示行動出於憐憫：「$12,309，佢老婆找我嘅，我 payme 佢太太。」同時間網民紛紛批評張致恒利用同情心，指其有錢投資卻無錢還債，並諷刺：「有基金在手，唔怪得之唔可以申請綜緩啦！」