洗衣凝珠（洗衣膠囊）近年在內地好流行，但用唔當會有嚴重後果。最近有婦女因用手撕開黏連嘅洗衣凝珠，導致洗滌液濺入眼內，角膜受損影響視力。北京網民「孫棠主」之前拍片交代事件經過，佢嘅太太喺中秋節前一晚（9月24日）洗衣服時，發現洗衣珠因潮濕黏住一齊，撕開時有膠囊破裂，洗滌液飛出傷及眼部。

太太當場用清水沖洗眼睛約10分鐘，但仍有痛楚，於是即時衝往急症室。醫生要求轉院睇眼科急症，並再用生理鹽水沖洗，外敷藥膏治療。不過醫生強調需找角膜專科醫生跟進傷勢。太太受傷翌日去訪同仁醫院角膜專科，發現眼角膜已被輕微腐蝕，醫生直言洗衣凝珠內含高濃度洗滌液，入眼後需要立刻大量清水沖洗，否則會永久損害視力。

浙江中山醫院眼科主任王潔解釋，普通洗衣液有效成分約10%-20%，但洗衣凝珠達80%以上，對眼球腐蝕力遠高於一般產品。佢指出，凝珠內嘅強鹼性成分會深入角膜組織，幾分鐘內便會造成明顯化學灼傷，引發劇痛、畏光、視力下降等症狀。專家強調當洗滌液入眼應馬上撐開眼瞼，用流動清水或生理鹽水由內眼角洗到外眼角，並不停眨眼轉動眼球，確保徹底沖洗。