國務院副總理丁薛祥昨日（13日）會見清華大學經濟管理學院顧問委員會代表，鼓勵各委員多為中國經濟發展出力。新聞聯播畫面仲顯示，與會者包括顧問會主席庫克，以及朱鎔基子朱雲來、前人行長周小川、前銀監會主席劉明康、前銀保監會主席郭樹清等，不過新加入嘅委員黃仁勳同蘇姿豐未出現。
丁薛祥同與會者討論人工智能發展同治理，強調呢項技術係引領新一輪技術革命同產業變革嘅關鍵力量，要好整體發展、運用同治理，更好造福人類。佢歡迎大家支持世界人工智能合作組織建設，並指出顧問會自2000年成立以來，一直係中外對話交流嘅重要平台。
畫面仲顯示，朱雲來喺會上坐喺騰訊馬化騰身邊，周小川、劉明康、郭樹清等前高層亦有參與。現任顧問會主席係庫克，成員包括馬斯克、納德拉、朱克伯格等國際企業高管，以及摩根大通、黑石同花旗集團等公司高層。
今年顧問會新增3名委員，包括黃仁勳、蘇姿豐同瑞士百達集團百達銘。該會主要職能係為學院發展提供意見，推動學術同產業合作，外企成員每年都會來華參與年會。
