而家正討論共建健康活力香港議案，由體育、演藝界霍啟剛帶頭，同社福界陳文宜、民建聯鄭泳舜提議修正案一併討論。霍啟剛引用國家主席習近平論述，指出「十五五」係達成健康中國目標嘅關鍵時期，預防健康問題係最經濟有效嘅方式。
選委界議員何敬康支持議案，佢話健康真係「三分靠操，七分靠飲食，十分靠堅持」。佢指政府成日講環保有成本，但其實健康一樣要付出代價。自言對體重管理做到「變態」程度，一直維持60公斤體重。佢強調健身主要係預防疾病，唔係為咗IG打卡式晒腹肌。
何敬康建議政府參考外國經驗，研究對高糖食品徵收額外稅，利用價格因素影響市民選擇。佢亦提倡減少學校飯盒煎炸物、辦公室推廣站立式會議，同公園、海濱增設街頭健身設施，方便市民「隨時隨地刷一組深蹲」。另外，佢希望升級「醫健通」應用，利用大數據監察血壓同卡路里消耗。
選委界議員管浩鳴指出，本港7000多名公營醫生服務8至9成人口，醫療系統出現多個「死結」。佢建議重新定位公營醫療專注急重症，同時優化醫保系統，鼓勵市民合理使用私營服務。管浩鳴更提出類似學校制度嘅醫療資助方案，認為政府同有能力市民各自出一半費用，可解決公營私營醫療矛盾。佢亦關注小學生近視率高達六成四，建議引入人工智能篩查，並倡議擴大長者醫療券同「慢病共治計劃」至內地，落實灣區病歷互認同跨境醫療結算。
