28歲名媛蔡天鳳（Abby Choi）2023年2月疑遭殺害後碎屍肢解，其前夫鄺港智、前家翁鄺球、前夫兄長鄺港傑被控謀殺及阻止合法埋葬屍體罪。審訊進入第16日，庭上播放蔡天鳳與鄺港傑日常互動片段，包括鄺港傑喺酒店房叫醒蔡天鳳，以及蔡天鳳喺鄺港傑玩笨豬跳時讚「好勇敢啊大伯真係」。
譚方駿喺接受辯方大律師Trevor Beel盤問時透露，佢約於2016至2017年首次見到鄺港傑，當時係因蔡天鳳帶佢去維港星岸單位。而譚方駿表示自己唔知鄺港傑喺University of California Irvine修讀經濟學科，坦言自己係讀文學院心理學課程。
譚方駿確認鄺港傑唔係住蔡天鳳持有的物業，指出鄺港傑曾透露住在荃灣海之戀。不過譚方駿承認當時有懷疑，但「無追問係咪真係住呢度」。佢表示與蔡天鳳及鄺港傑係親密朋友，自2020年起三人均會外出用膳，大部分時間由譚方駿支付飯錢，鄺港傑偶爾才會付款。
另外譚方駿指出，三人有時會前往澳門賭博，並指鄺港傑「佢有贏有輸」。當被問及蔡天鳳子女愛吃雞蛋仔是否為開設店舖主因時，譚方駿強調「開呢間店原因絕對唔係因為小朋友鍾意食到要開舖」，同時間提及鄺港傑曾管理雞蛋仔店，但自己唔知係咪「做生意」。
譚方駿於2015年澳洲畢業返港，2015至2022年協助父親處理譚仔公司事務，現時則協助家族生意及物業租務。佢唔清楚蔡天鳳如何投資理財，但指蔡天鳳在照顧細路同投資事務均「處理得好好」。
